இது தான் நியதி
மழலையாயுதித்து உடலுறுப்புத் தளர்வால்
மழலையாகுமிது வாழ்வு நியதி.
நடைவண்டியூன்றி நடை பழகி
தடையான செயலூக்கம் தவிர்க்க
விடை தருகிறது ஊன்றுகோல்.
இறப்பு, பிறப்பு அற்புதம்
மழை, சூறாவளியியற்கை நியதி.
சக்தியின் சுற்றுப் பாதையானதால்
கோவில் பிரகாரத்தை இடமிருந்து
வலமாகச் சுற்றல் வலிமையுடையது
வணக்கத்துடன் சந்தித்து, சுணக்கமானால்
மன்னிப்புதிர்த்து, பிணக்கென்றால் பேசியவிழ்ப்போம்.
புலன்களை அடக்கியாளப் பழகும்
மூச்சுப் பயிற்சியாம் நியதிகள்
வீச்சுடை சமுதாயம் அமைக்கும்.
காலை மாலையிறை வணக்கம்.
தூரப் பயணமாவோர், மணமக்கள்,
பிரசவம் முடித்தவரில்லம் வர
மஞ்சள், சுண்ணாம்பு நீருடனொளியால்
ஆரத்தி எடுத்தல் சுகாதாரநியதி.
மனத்துயர்களைக் கொட்டுதல் மனபாரம்
அகற்றுமென்பது மனவியலின் நியதி.
புலமைத்துவத்தால் பட்டம் பெறுதல்
நலமுடை அறிவியல் நியதி.
நியதியுடை வாழ்வு இன்பமே.
20-7-2017
கருத்துகள் இல்லை:
கருத்துரையிடுக