கடப்பாடுடன் கடைத்தேற வேண்டாமோ!!!!!
00
தீர்க்க அறிவின் நுண்ணுனர்வின்
கோர்க்கும் அதிகாரம் கோணலாகும்
பார்க்கும் பார்வைத் தெளிவுடன்
நீர்க்கும் விவாதங்கள் தகர்ந்திடும்.
00
வண்ணங்களாகட்டும் மன எண்ணங்கள்
திண்ணமாய் மாறும் தடுமாற்றம் நிலைமாற்றத்தால்
எதையும் மனங்கொண்டு ஏற்று
எதிர்நிச்சலாடலாம் நல்லதை விதைத்து.
00
போதிமரம் ஆகலாம் பனுவல்
சோதியெழும் கவி தவமாகலாம்
பாதியெழுதிய இதுவும் தவமாகுமோ!
பார்க்காது நீவிட்டால் அவமாகாது
00
தமிழீயும் போதை கவிதை
நிமிர்ந்திடும் மாருதமாயுன் பாதையில்
நருமதையாய்த் தொடர்!
பெருநிதியாய் வியாபிப்பாய் உயர்!
00
ஊரெல்லாம் ரீங்காரமிடுமோவென் கவிதை
ஊஞ்சலாடுமோ இறக்கை விரித்து!
ஏ! என்னைப் பாரென்று
ஊற்றுக்கண் திறக்குமோ ஊன்றுகோலாகுமோ!
00
கவிதையென்னுள் பூத்துக்கொண்டிருப்பது
உவிதலற்ற இன்பம் ஊர்தலாக
விதவிதமான சொற்பிழைகளால் வேதனை!
பவித்திரம் தமிழில் பழுதடையுதே!
00
எழுத்துப் பிழை எழுந்தால்
கழுத்து இறுகுவதான கடுப்பு!
கடைத்தேற வேண்டாமோ கடப்பாடுடன்!
களிம்பேறாமல் மொழியைக் காப்பாற்றுங்கள்!
00
நிலாக்கவிஞர் - வேதா. இலங்காதிலகம் டென்மார்க் - 21-11-2021
கருத்துகள் இல்லை:
கருத்துரையிடுக