இமைக்கா நொடிகள்.
இமைக்கா நொடிகள் இமை தாண்டி
அமைவாய் மலர்த்துமா! எதிராய் வருத்துமா!
குமைத்தலாக இன்றிக் குதூகலம் தரட்டும்.
சமைக்கட்டும் சித்திரமாய்! இலகுவாய் முத்தமீயட்டும்!
00
அமையட்டும் அற்புதமாய் அசையும் கனவாய்.
சுமையற்ற கணங்களாய் சுழரட்டும் வியப்புகள்!
தமை வெளிப்படுத்தி தண்மை மொழியாய்
சமைவு தரட்டும் சரித்திரம் ஆகட்டும்.
00
பகைக்காத பதறாத பரிவுடை விநாடிகள்.
தொகையாகி என்னைத் தொந்தரவு செய்யட்டும்
முகையவிழும் மெல்லிய முறுவலாய் இன்பம்
வகையாகி அவிழ்ந்து வரையின்றி நிறையட்டும்.
00
இமைக்கா நொடி இசைந்த காற்றை
இனிமை நாதசுரத்துள் இணைக்கட்டும். இசையாக
இசைத் தமிழ் இசைந்து விரிக்கட்டும்
இசைப் பயணம் இடுக்கண் களையட்டும்.
00
குருமணலின் மென்மையாய் குளுகுளு காற்றும்
குளிர்ந்த மழையாய்க் குளிப்பாட்டட்டும் என்னை
குறுஞ்சிரிப்பாய்க் காதல் குலவட்டும் என்னோடு
குறளடிகள் குவியட்டும் குளுகுளுப்பாய் முழுநொடியும்.
00
கவிமலை -வேதா- இலங்காதிலகம் - டென்மார்க் 5-12-2018.
Rathy Mohan
பதிலளிநீக்குஇமைக்கா நொடிகள்
இன்பம் தரட்டும்.. நல்வரிகள்..
· Reply · 3y
Vetha Langathilakam
மகிழ்ச்சி ரதி அன்புடன் வேதா.
5-12-2018
Sujatha Anton
இமைக்கா நொடி இசைந்த காற்றை
இனிமை நாதசுரத்துள் இணைக்கட்டும். இசையாக
இசைத் தமிழ் இசைந்து விரிக்கட்டும்
இசைப் பயணம் இடுக்கண் களையட்டும்.
நிறைந்த கருத்து. வாழ்க தமிழ்.!!!!
5-12-2018