339. (902) அம்மாவின் நலமறிந்து...

 

அம்மாவின் நலமறிந்து...

அதிகாலை துயில் நீங்க

திகில் போலொரு ஏக்கம்

பொதியாக ஒரு மனத்தாங்கல்

பதியே! நீ அருகில் இல்லை

உத்தியோக  இடைவேளையில்

நித்தமும் தொலைத்தொடர்பில்

மொத்தமும் பரிமாறிடல்

சித்திக்கவில்லையெனும் ஏங்கல்

மாலையானால் தாயின்

சேலை தேடும் குழந்தையாய்

வேலை முடிய நீ வருவாய்

அவ்வேளை தேடுதே மனம்

காதலின் கலையரங்கில்

கானடா இசைப்பவரே  உம்

கருவறை ஆலயம் காண

கடிதென  பறந்தவரே

தமிழோடு உறவாடல்

அளவோடு சமையல்

ஒரு குவளை தேநீர்

சிறிது உணவு தயார்!

பிரிவெனும் அழலின்

எரிவுக்குத் தாள்!

ஊடகத்தோடு பதிகம்

பாடுகிறது மனம் அதிகம்.

அன்புக்குள் வாழ்வினை

அடங்கவைத்த அன்பரே

அன்புச் சுவடுகளை 

அழகாக எண்ணுகிறேன்

அம்மாவின் நலமறிந்து

அமைதியாய்த் திரும்பிடுவாய்.

2-8-2003

(இலண்டன் ரைம் கவிதை நேரம்.)