292. (855 ) மனப் பிரசவம்.--- எழுதுகோல்

 

மனப் பிரசவம்.

விதமான சொற்கள் வண்ணமாய்

பதமான எண்ணப் பகுப்பில்

மிதமான சுவடுகள் மகத்துவமாய்

மத மதவெனப்  புரண்டது  மங்கலமாய்

வித்தகச் சிறு விதைகள்

புத்தம்புதுக் கந்தருவப் பனுவலாகிறது.

புத்தகம் விசிறிடும் உற்சாகச் சாரல்

மொத்தமான அங்கீகார மதர்த்தலேயிது.

உறவு உணர்வு வழி மனப்பிரசவமிது.

பறவைச் சிறகுத் துடுப்பென 

இறகு எழுதுகோல் இணைத்து

எழுதுகிறேன் மனதிற்குத்   திருவேற்ற

நிகழ்தலாகிறது விசையுறு பந்தினைப் போல்

மேதகு நன்மைகள் வாகை சூடும்

சமன் குலையாத  மனம் பிளவுபடாது

மேம்பாடு இன்ப மரகதமாகும்.

மனமுடையும் நேரத்தில் மதுரச்சாரல்

கனமுடைத்துக் களிப்பை விசிறும்.

வனமுடைந்து வீழும் மழை போல

அனந்த சக்தி ஆளுமை விருத்தி

கனன்று விரிந்து கதிர் பரப்பும்.

தமிழ்  அருவியாகிட கொடுப்பனவு

வரமாகிறது   கரமிணைய மனமும் தேவை    

தரம் முன்னிலையில் வேண்டும்

;( மத மதவென- வலிமை,    மிகுதி,     அழகு

மதர்த்தல் - செழித்தல். அனந்தம் - அளவற்ற)

 19-2-2020

வேறு:-  

எழுதுகோல்

எழுதுகோல் ஒரு ஆயுதமே

எழுச்சியாளன் வலுக்கரத்தில்

விழுவது காதல் பூக்களானால்

எழுதுகோலொரு துப்பாக்கியோ!

எழுத்தாளன் பண்படுத்தும் உழவனானால்

எழுதுகோலொரு கலப்பையோ!

புவி சிறக்கத் தமிழ்த்தோப்பாக வருக

புகழோடு  புதிதாய்ப் புனிதமாக வருக

2010